Tanda Kiamat

Tanda Kiamat

Azwardi*

lam kitab Tuhan haba peuingat
tanda kiamat meumacam bagoe
soe nyang tém ingat tentèe seulamat
akhirat laba donya han rugoe

di aneuk-poma jinoe takalön
ka lagèe sayéd menjadi lamiet
aneuk ka jadi peugawè nanggroe
poma jiyue woe jaga aneukmiet

nyang mat keumudoe dum ureueng jahé
han trôh jipiké keu haleue hareuem
‘ileum’èe kureueng moral pih reulé
nyang peunténg hasé le dalam baluem

qanun syari’at jeuet keu cari ‘ap
h’an ék jipagap laknat maksiat
korup ngön zina le ka terungkap
gadöh lam awö bak prèh-prèh siat

inöng ngön agam ka jimeukap-kap
qanun h’an jeuet rab nyan kawan ram’è
menyoe meulinteueng bak teumpat sengap
can keunöng garap kön jipeudam’è

aneukmiet cut-cut beuet ka hana lé
bak kaca kafé meulalè mata
ma ngön abu h’an tém peugah lé
bak balè teungku pih tan lé soe tém ba

meukat peunajôh sigala macam
di keudèe peukan napsu meubura
manok teureubôh ruti teuseumbam
peuturôt hawa ngön macam rasa

kupi itam phét ngön capli masam
ruah lam badan tiep uroe tuhan
tubôh ka geuhön jigintön malam
tahajjud ka bren keu ingat tuhan

lang’èt ka tutông bumoe ka su-uem
nyan tanda alam karab binasa
reu-ôh meucrok-crok uroe ngön malam
nyankeuh ban tamsé lam padang masya

meunyoe amalan hana lam reugam
meulham-lham timue lam la-ôt darah
tapi meunyoe na ‘amai lam badan
lam jalô syurga tubôh meutuah

*****

(Meunasah Papeun, Mei 2010)
*Azwardi; Dosen Gemasastrin FKIP Unsyiah