Ingin Kembali

Di sini aku mulai bermimpi
Saat berjibaku mengais rezeki
Mulai tueng upah ceumatok setengah hari
Hingga dom pade di malam sunyi

Membalik tanah
Menabur benih
Menyeret umbai
Menyiang gulma
Menebar urea
Menyembur pestisida
Menggenggam neubai
Menggulam perontok
Memanggul biji berkarung padi

Saat dara pade
Inilah masa hati bersedih
Musem jiklik cangguek istilah kami
Jangankan dji sam soe commodore terasa madu
Jangankan menatap melirik dia aku ragu
Catatan utang tinggi sepinggang
Di beberapa kios setiap simpang
Berapa persis tak boleh tahu
Pokoknya panen mesti terlunas habis

Bila masa panen tiba
Musem cot jindrang kata kami
Saatnya hati berbunga mekar
Pertanda utang kan segera sirna
Pertanda poding kan merajalela
Petanda sorot kan lurus menatap
Pertanda potongan kan mantap lagi

Kutak mau terjebak pilu di antara dua musim itu
Maka aku bertekat pergi...

Itulah sinopsis hari-hariku
Sepenggal episode di masa lalu
Yang kini kian kurindu tuk kembali
Merenda hari seperti dulu
Di kampung asal mulaku
Meureudu yang bersahaja

Kini mimpi itu jadi maujud
Tapi aku terkejut-kejut
Takut
Tersangkut di ranting yang rapuh
Terkapar di pulau riuh yang gaduh
Terombang-ambing di lautan yang tak teduh

Nafakah Tanbarakah

Nafakah Tanbarakah

le that meubalôt peurangui ureueng
meutu-ôt ngön rueng bak mita harta
ureueng meula-ôt bak janggôt udeueng
ateuh rhueng ureueng peugawè kota

nyang mat keumudoe hana jipakoe
abéh jicawö dum pèng negara
nyang na jipiké puwoe pangkai droe
peuteubai kéh droe keu bagah kaya

jijôk peuroyèk keu reukanan droe
asé jicakoe ngön macam lanie
wasé peuroyèk hantom na bakoe
peuraya pruet dhoe ngön mumacan fee

nyang duek bak keudèe sukat geukureueng
geutipèe ureueng ngön macam cara
pangkai lhèe reutôh peugah sikureueng
di dalam ruweueng dum geucok laba

la-én lom cara nyang rèsèp ubat
saré geutakat kaya du’afa
nyang kolèsterol ngön asam urat
leubèh meukarat nyang keunöng gula

di gurèe leubèe pih saboh lagu
meusaboh buku h’an geutém raba
gadôh geu-afai hana pèng teungku
padahai meuyueyue dari negara

pih saboh lagèe ureueng geumadèe
leumak meulakèe rata jeuet banda
gaki geubalôt peudiyeueng purèe
ngön ija tumpè mita beulanja

ladôm ka mumang hana meuho kông
jak geupai bakông peumabôk bansa
pangkai ka reulé ladang pih tutông
bak sabu langsông aléh keurija


(Meunasah Papeun, Januari 2011)
Azwardi; Dosen Gemasastrin FKIP Unsyiah

Peugawè Paloe

Peugawè Paloe 

nyang na ijazah geuputa ulè
geutèh peugawè keu gura-gura
meumacam ilah daya geuseutè
beuthat tan teuntè lulôh keurija

tamöng peugawè macam instansi
meuharap gaji bak po negara
nyang lulôh numbôi meusoe-soe jibri
keu nyang na gaki atau syèdara


nyang lôp ngön pangkai ie babah putéh
bak sagoe bintéh jipeupö sigra
teuma menyô pèng le di dalam kéh
nan nyang meutindéh jisuet u lua

ka meunan cara dônya ka akhé
ngön cara bakhé mita beulanja
meunyô h’an tatém cara nyan lagè
meukeumeulintèe h’an soe peutaba

bèk tamulai dengön buet salah
hana barakah sabé lam phangphoe
beurayek yöteuh keu ‘azeueb Allah
tubôh mangat glah bak uroe dudoe

bèk sagai dilé lam darah gapah
nafakah salah keu aneuk cucoe
até jih batat hana meutuah
sabé jih reubah lam uteuen duroe

ulama sufi meunan geupeugah
udép mangat sah h’an teulah dudoe
meunyô lam asoe jinuep pèng salah
peue nyang tapeugah hana jipakoe

beuteugöh-teugöh wahé e abah
puwoe nafakah keu aneuk binoe
meunyô meucawö gata meusalah
bak mata Allah rayek that paloe


(Meunasah Papeuen, Desember 2010)
Azwardi; Dosen Gemasastrin FKIP Unsyiah

Syair Ramadan

Syair Ramadan

lônpujoe Tuhan Allahurabbôn
seulaweuet saleuem lônpuphôn haba
keu bandum kaôm nyang pubuet rukôn
nyang teupeue hukôm buleuen puasa

Ramadan buleuen pangulè buleuen
buleun tapeutheunhawa nyang luhu
jiwa tapeugléh até tapeuleuen
bèk sabébuleuen meuruerue napsu

beuseuenggôh-seuenggôh pubuet ibadah
wajéb tapeuglah sunat taangkèe
sithôn tamita sibuleuen pajôh
tabri hak tubôh bèk sampé lalè

nyang cok teurawèh meubida taklét
ladôm lét lapan ladôm dua plôh
malam-malam phôn meulasah punoh jamaah sidöt
dilingkeue siplôh shaf ka tirut ban iku tikôh

meukat peunajôh meumacan patèe
bôh yum meuribèe keu sigö padan
geutak u mudageunje ié teubèe
cindôi geurandèe bak taloejalan

buka puasa ngön ie boh timön
bohrômrôm teumön kanji ngön leumang
bèk götthat bulôbak ‘uet makanan
jantông ng’ob uleteuh mumang

di cuda mawa pih götthat gadôh
peugot peunajôh meutaga-taga
hana geupakoe seukè nyang siplôh
kuéh thô geutrôh keu uroe raya

lailatul kadar malam lé tuah
jai that Geuruah malaikat Tuhan
bèk sampé lupôt rahmah magfirah
itkumminannar glah akhé tujuan

rukôn sampôrna amai h’anragu
tabôh hai abu pitrah beuidin
sukat ngön breuehbit peujôk bak teungku
tadireue laju keu fakir miskin

(Meunasah Papeun, Ramadan 1431 H)
Azwardi; Dosen Gemamastrin FKIP Unsyiah

Tanda Kiamat

Tanda Kiamat

Azwardi*

lam kitab Tuhan haba peuingat
tanda kiamat meumacam bagoe
soe nyang tém ingat tentèe seulamat
akhirat laba donya han rugoe

di aneuk-poma jinoe takalön
ka lagèe sayéd menjadi lamiet
aneuk ka jadi peugawè nanggroe
poma jiyue woe jaga aneukmiet

nyang mat keumudoe dum ureueng jahé
han trôh jipiké keu haleue hareuem
‘ileum’èe kureueng moral pih reulé
nyang peunténg hasé le dalam baluem

qanun syari’at jeuet keu cari ‘ap
h’an ék jipagap laknat maksiat
korup ngön zina le ka terungkap
gadöh lam awö bak prèh-prèh siat

inöng ngön agam ka jimeukap-kap
qanun h’an jeuet rab nyan kawan ram’è
menyoe meulinteueng bak teumpat sengap
can keunöng garap kön jipeudam’è

aneukmiet cut-cut beuet ka hana lé
bak kaca kafé meulalè mata
ma ngön abu h’an tém peugah lé
bak balè teungku pih tan lé soe tém ba

meukat peunajôh sigala macam
di keudèe peukan napsu meubura
manok teureubôh ruti teuseumbam
peuturôt hawa ngön macam rasa

kupi itam phét ngön capli masam
ruah lam badan tiep uroe tuhan
tubôh ka geuhön jigintön malam
tahajjud ka bren keu ingat tuhan

lang’èt ka tutông bumoe ka su-uem
nyan tanda alam karab binasa
reu-ôh meucrok-crok uroe ngön malam
nyankeuh ban tamsé lam padang masya

meunyoe amalan hana lam reugam
meulham-lham timue lam la-ôt darah
tapi meunyoe na ‘amai lam badan
lam jalô syurga tubôh meutuah

*****

(Meunasah Papeun, Mei 2010)
*Azwardi; Dosen Gemasastrin FKIP Unsyiah

Visit Banda Aceh Yeueh

idin kali nyo bacut lônpeugah

wisata bhah kota geutanyô 

bandar islami sabé bak babah

hana soe bantah bandum geupeu-‘ö

visit Banda Aceh dua ribèe siblah

program geugagah lé walikota

rata jeuet sagoe dum tadeungö gah

geuneuk peuceudah bandar wisata 

wisata islami meunan geusyarah

sabé geupeugah keu jamèe lua

objek tsunami pih saboh ceudah 

teumpat ziarah ureueng nyang teuka

nyang peunténg ide bèk salah kaprah

bèk leupah peugah binasa nanggroe

nyang atra gob po tanyô bèk latah

tatham beubagah jaga marwah droe

inöng ka banggi duek keudè kupi

nyan hai e akhi kön budaya droe

agam pih ka dok ngön sinyal wi-fi

bak dali ta-eu kayém lam laloe

wisata alam gunông bahari

golom islami takalön rupa

inöng ngön agam manoe meuh’i-h’i

‘aurat deuh meuri meucula-cula

piké e wali nyang peulheuh program

salah sasaran gata meudèsya

bèk sampé luhu buet-buet nyang hareuem

bak mita harum nama lam dônya

bah lé tapiké keu aneuk nanggroe

‘ileume tahiroe moral tapiké

bèk sampé seusat aneukteuh rugoe

syari’at phangphoe ‘itikeued reulé

mumada ’ôhnô haba lônca-é

lônpulang piké keu nyang po kota

seubagoe warga bacut bri piké

seumoga sabé Tuhan peulara

Hikayat Peunayong 

teuma nibak nyan idin lônsinggông

peukan Peunayông gampông di Cina

menyô na salah mubèk teusinggông

meu’ah lônlambông keu Tionghoa

gampông Peunayông bacut lônkisah

kota meuruah teumpat niaga 

gampông keunangan punoh sejarah

kota hareukah di Kutaraja 

macam usaha meukat tiep uroe

rata jeuet sagoe uroe ngön malam

di pasai eungkôt ngön bengkè moto

na cit nyang laloe mita hiburan

klinik meu-ubat ngön penginapan

shoroom kendraan lengkap seudia

ureueng meula-ôt sinan labôhan

toe rumoh Tuhan ubé-bé raya 

di mugè manok ngön toké gulè

keunan geurandè tiep uroe tuhan

nyang perlè koh ôk geupuphui ulè

pih sinan lalè peumangat badan

ôh watè malam ka la-én lom hi

kursi meuriti dum taloe jalan

meukat peunajôh mumacan isi

bagi raseuki keu handai taulan

teuma nyang unik nibak gampông nyan

lé that di sinan di ureueng Cina

ka hat jameun kön kana di sinan

memang ka meunan di Tionghoa

rata jeuet banda bak sigom dônya

na ureueng Cina sajan pribumi

beuthat budayageuh that ji-ôh bida 

gobnyan that sunggôh mita raseuki

dari jameuen kön sampo ‘an jinoe

h’antom meulaloe mita beulanja

bamdum geumeukat peumakmu nanggroe

teuma sidro-droe sambông sikula 

bak teumpat jiduek sinan jimeukat

hana meuhajat keu rumoh raya

nyang peunténg udép sabé hareukat

ngat bèk meularat di dalam dônya

bahasa Acehgeuh götthat fasèh

sahèh meuleubèh nibak po basa

nyang mubloe barang bèk sampé teupèh

ngön basa Aceh lancar usaha

teuma na seudéh kadang sigö-gö

pakön po nanggroe hana padoli

di awak Cina pih na budaya droe 

patôt tahiroe ngön tahargai 

tapi kali nyô troh seunang até

kageutém piké kageungieng kalön

festival Peunayông jinoe ka lahé

mirah meublé-blé lampu lampion

tabék lônpeu-ék keu walikota

ruang geubuka keu Tionghoa 

peugöt peasan peuleumah citra 

peudeuh budaya bak ureueng lingka

deungön festival Peunayông raya 

talakè warga keukai lam damè

beutameujroh-jroh ngön dum manusia

mangat teubuka pintô sijahtra

beuthat meubida agama geumè

bèk tapeuc’èc’è rukôn teutangga

nyang peunténg sabé udép beudamè 

sabé peuramè peumaju kota  

akhérul kata lônpeutrôh kalam 

keu Banda Aceh nyang ka göt tuha

seulamat ultah keu lapan reutôh nam

seumoga aman makmu sijahtra

(Meunasah Papeun, Mei 2011)

Azwardi; Dosen Gemasastrin FKIP Unsyiah

Muhasabah Tsunami

Muhasabah Tsunami

(Keunarang Azwardi)

sampul buku

tanggai dua plôh nam thôn dua ribèe peuet

uroe Geujeuruet bumoe lé Allah

tsunami bala Geulhom ubebuet

seubab buet salah dum tapeuleumah

bumoe Geuyok-yok la-ôt Geupeuhah

kuasa Allah tan soe jeuet larang

nyawöng ngön harta abéh dum reubah

ie beuna reupah tan jeuet soe halang

apui di timu ie dari barat

meunan isyarat lé sidroe teungku

peumimpin zalém pih tanda nyang brat

nyan seubab kuat bala hai teungku

dengön ie beuna bumoe ka Geurhah

leuhôp Geuruah peusuci nanggroe

nyang lé that tinggai cit rumoh Allah

sadar beubagah keudéh peujôk droe

bagi geutanyoe nyang mantöng umu

bèk lé meulangue dalam beuet salah

dônya takeubah kiblat tapeukeue

musabah tageue zikir keu Allah

keunan bak kubu tajak ziarah

keu mandum aruwah tapeujôk do’a

ampôn talakèe kubu beuluah

bak Poteuh Allah nyang peujeuet dônya

bèk meu-ulang lé maksiet keu Allah

bagah tateugah buet-buet nyang ganjé

mandum geutanyô beutatém peugah

amai meutuah keu pangkai maté

keu para wali nyang le rupiah

hiroe beubagah kaôm du’afa

bèk lé p’uep darah lagè buet lintah

teumpat nyang pantah beutabri sigra

nyang bri syafa’at nyang meufa’edah

sabah tapeugah ateuh dum rahmat

mudah raseuki tinggi maruah

lam lindông Allah sampoe kiamat

(Meunasah Papeuen, Desember 2010)

Azwardi; Dosen Gemasastrin FKIP Unsyiah

Marhaban ya Ramadan

Marhaban ya Ramadan

buleuen mulia ka trôk geugisa

sya’ban jibungka gantoe ramadan

cukôp jai pahla soe nyang puasa

meu-ampôn dèsya meutuah badan

jak tajak sambôt buleuen puasa

ngön ruh bahgia jiwa beuseunang

beumangat até beulapang dada

lagè gembira bak uroe meugang

bak buleuen ra’jab tapeuluen badan

‘ôh trôk bak sya’ban tapeutrang até

tapeugléh nyawöng dalam ramadan

peule ‘amalan keu pangkai maté

talakè meu’ah bak handai tolan

mungkén na rakan meusantök desya

mangat meusaneuet tapujoe tuhan

teuentè jroh badan bak tapuasa

susôn rencana pubuet ‘amalan

uroe ngôn malam peule ‘ibadah

tipèk bak bintéh jadwal mumacam

‘amai tagulam peujôk bak Allah

beutrôh puasa sibuleuen punoh

beutameuseunoh baca quru-an

seumayang limöng beu-ék jama’ah

beule seudeukah bagi makanan

geuyue theuen nasu kön hanya pajôh

beutatém peutrôh u dalam dada

pubuet ‘ibadah beuseuenggôh-seuenggôh

wajéb tapeutrôh sunat taganda

buleuen nyo geubri leupah jai rahmah

tamah magfirah keu ampôn dèsya

‘itikumminannar beujeuet tareupah

peulepah badan nibak nuraka

uroe nyo mantöng lam akhé sya’ban

singöh ramadan puphôn puasa

marhaban ya syahru ramadan

ya syahrassiam peuet blah lhèe tiga

(Meunasah Papeun, Sya’ban 1433 H)

Azwardi; Dosen Gemasastrin FKIP Unsyiah; E-Mail azwardani@yahoo.com

Hikayat Bola

ilustrasi bola

Hikayat Bola

Azwardi*

piasan raya limöng thôn sigö

katrôk meusampoe piala donya

idin minggu nyo bacut lôncawö

haba meulaloe bak bola dônya

***

ban sigom dônya ureueng teubeudöh

cukôp jai nyang dok bak nonton bola

mulai meugréb sampoe ‘an suboh

Afrika gadôh meusaho mata

***

penyakét lama han gadöh-gadöh

po muda beudöh gantoe nyang tuha

peuturôt hobi rohani reulöh

badan jeuet awôh bak jaga bola

***

Afrika Seulatan Mexico lawan

puphôn piasan sipak bhan dônya

di keudèe kupi sipanyang jalan

bak layeue raya meublèkblèk mata

***

keu sunat malam hantom geubeudöh

mata ka teuplöh meunyoe bak bola

seudia kupi kacang ngön rukok

mangat bèk suntôk bak prèh poh dua

***

judi teumarôh pih hana jeu-ôh

kayém meusalôh bak nonton bola

nyang lé-lé pangkai puduek ôn reutôh

mada bu bungkôh nyang hana daya

***

nyang leupah sayang iman dum reulé

pansan dum saré lheuh nonton bola

han ék lé beudöh seumayang suboh

ka lagèe baköh jinom lam paya

***

nyang mat Beurazil ka gadöh seunang

Beulanda meunang hana soe sangka

Jerman pih talô tan na teubayang

Spanyo garang ra-èh piala

***

sép ‘ohno dilèe haba lônrawi

bak la-én kali tasambong teuma

nyang peunténg ingat wahé e akhi

mita raseuki nyan buet utama

***

(Meunasah Papeun, Juli 2010)

*Azwardi; Dosen Gemamastrin FKIP Unsyiah

Aneuk Gunci Syuruga

Aneuk Gunci Syuruga

saleuem lôndireue do’a lônbagi

keu bamdum akhi tuha ngön muda

pujoe keu Allah seulaweuet keu Nabi

nyang bri raseuki nikmat syuruga

bacut lôncanèk ca-é minggu nyo

keu bandum tanyoe umat Iseulam

udép lam dônya bèk sampé rugoe

meuseubab laloe keu hukôm Tuhan

‘oh watè tawoe tanyoe bak Tuhan

dua tujuan syurga nuraka

meunyo meukeusud meutuah badan

beuna hai taulan gunci syuruga

lam kitab hadih haba geurawi

muhammad Nabi peugah bak umat

tamöng syuruga na nam neuk gunci

soe nyang padoli teuntèe seulamat

peugah ubé buet pubuet ubé na

keurija beuna haba bèk sulét

meunyô manusia jujô tan lé na

akhérat dônya teuntèe meupalét

janji bèk mubah amanah bèk meutuka

peuglah beusigra peutrôh bubagah

bèk sampé tuwö gata ceulaka

lam apui raya meukuah-kuah

pharöt tajaga syahwat bèk luhu

tatheuen hai alu birahi gata

bèk teupeungarôh pilem ngön lagu

atawa hantu di alam maya

mata bèk teusuet kalön buet jahé

bèk laloe até péasan dônya

taglip Quru-an tapeutrang até

ulè beusabé piké agama

jaroe bèk cabak rahôb ata gob

reubah lam leuhob hana soe hila

asoeteuh durôh darahteuh meulhob

akhé geutinthob dalam nuraka

sép ‘ohnoe dilè ca-é lôncanék

haba dari nék asai bak Nabi

beu-ék tapubuet adak rayek hèk

syurga meutipèk teuhah Tuhan bri

(Meunasah Papeun, Oktober 2010)

Azwardi; Dosen Gemasastrin FKIP Unsyiah

Peunayong; Kota Full Bisnis

Peunayong; Kota Full Bisnis
Oleh : Azwardi

teuma nibak nyan idin lônsinggông
peukan Peunayông gampông di Cina
menyô na salah mubèk teusinggông
meu’ah lônlambông keu Tionghoa
gampông Peunayông bacut lônkisah

kota meuruah teumpat niaga
gampông keunangan punoh sejarah
kota hareukah di Kutaraja
macam usaha meukat tiep uroe

rata jeuet sagoe uroe ngön malam
di pasai eungkôt ngön bengkè moto
na cit nyang laloe mita hiburan
klinik meu-ubat ngön penginapan

shoroom kendraan lengkap seudia
ureueng meula-ôt sinan labôhan
toe rumoh Tuhan ubé-bé raya
di mugè manok ngön toké gulè

keunan geurandè tiep uroe tuhan
nyang perlè koh ôk geupuphui ulè
pih sinan lalè peumangat badan
ôh watè malam ka la-én lom hi

kursi meuriti dum taloe jalan
meukat peunajôh mumacan isi
bagi raseuki keu handai taulan
teuma nyang unik nibak gampông nyan

lé that di sinan di ureueng Cina
ka hat jameun kön kana di sinan
memang ka meunan di Tionghoa
rata jeuet banda bak sigom dônya

na ureueng Cina sajan pribumi
beuthat budayageuh that ji-ôh bida
gobnyan that sunggôh mita raseuki
dari jameuen kön sampo ‘an jinoe

h’antom meulaloe mita beulanja
bamdum geumeukat peumakmu nanggroe
teuma sidro-droe sambông sikula
bak teumpat jiduek sinan jimeukat

hana meuhajat keu rumoh raya
nyang peunténg udép sabé hareukat
ngat bèk meularat di dalam dônya
bahasa Acehgeuh götthat göt fasèh

sahèh meuleubèh nibak po basa
nyang mubloe barang bèk sampé teupèh
ngön basa Aceh lancar usaha
teuma na seudéh kadang sigö-gö

pakön po nanggroe hana padoli
di awak Cina pih na budaya droe
patôt tahiroe ngön tahargai
nibak thôn nyang ka trôh seunang até

kageutém piké kageungieng kalön
festival Peunayông watèe nyan lahé
mirah meublé-blé lampu lampion
tabék lônpeu-ék keu walikota

ruang geubuka keu Tionghoa
peugöt peasan peuleumah citra
peudeuh budaya bak ureueng lingka
deungön festival Peunayông nyang ka

talakè warga keukai lam damè
beutameujroh-jroh ngön dum manusia
mangat teubuka pintô sijahtra
beuthat meubida agama geumè

bèk tapeuc’èc’è rukôn teutangga
nyang peunténg sabé udép beudamè
sabé peuramè peumaju kota
akhérôl kalam kata lônpeutrôh

keu Banda Aceh nyang ka göt tuha
seulamat ultah keu lapan reutôh tujuh
bala beuji-ôh makmu trôh teuka

(Meunasah Papeun, Desember 2012)
Azwardi; Dosen Gemasastrin FKIP Unsyiah