idin kali nyo bacut lônpeugah
wisata bhah kota geutanyô
bandar islami sabé bak babah
hana soe bantah bandum geupeu-‘ö
visit Banda Aceh dua ribèe siblah
program geugagah lé walikota
rata jeuet sagoe dum tadeungö gah
geuneuk peuceudah bandar wisata
wisata islami meunan geusyarah
sabé geupeugah keu jamèe lua
objek tsunami pih saboh ceudah
teumpat ziarah ureueng nyang teuka
nyang peunténg ide bèk salah kaprah
bèk leupah peugah binasa nanggroe
nyang atra gob po tanyô bèk latah
tatham beubagah jaga marwah droe
inöng ka banggi duek keudè kupi
nyan hai e akhi kön budaya droe
agam pih ka dok ngön sinyal wi-fi
bak dali ta-eu kayém lam laloe
wisata alam gunông bahari
golom islami takalön rupa
inöng ngön agam manoe meuh’i-h’i
‘aurat deuh meuri meucula-cula
piké e wali nyang peulheuh program
salah sasaran gata meudèsya
bèk sampé luhu buet-buet nyang hareuem
bak mita harum nama lam dônya
bah lé tapiké keu aneuk nanggroe
‘ileume tahiroe moral tapiké
bèk sampé seusat aneukteuh rugoe
syari’at phangphoe ‘itikeued reulé
mumada ’ôhnô haba lônca-é
lônpulang piké keu nyang po kota
seubagoe warga bacut bri piké
seumoga sabé Tuhan peulara
Hikayat Peunayong
teuma nibak nyan idin lônsinggông
peukan Peunayông gampông di Cina
menyô na salah mubèk teusinggông
meu’ah lônlambông keu Tionghoa
gampông Peunayông bacut lônkisah
kota meuruah teumpat niaga
gampông keunangan punoh sejarah
kota hareukah di Kutaraja
macam usaha meukat tiep uroe
rata jeuet sagoe uroe ngön malam
di pasai eungkôt ngön bengkè moto
na cit nyang laloe mita hiburan
klinik meu-ubat ngön penginapan
shoroom kendraan lengkap seudia
ureueng meula-ôt sinan labôhan
toe rumoh Tuhan ubé-bé raya
di mugè manok ngön toké gulè
keunan geurandè tiep uroe tuhan
nyang perlè koh ôk geupuphui ulè
pih sinan lalè peumangat badan
ôh watè malam ka la-én lom hi
kursi meuriti dum taloe jalan
meukat peunajôh mumacan isi
bagi raseuki keu handai taulan
teuma nyang unik nibak gampông nyan
lé that di sinan di ureueng Cina
ka hat jameun kön kana di sinan
memang ka meunan di Tionghoa
rata jeuet banda bak sigom dônya
na ureueng Cina sajan pribumi
beuthat budayageuh that ji-ôh bida
gobnyan that sunggôh mita raseuki
dari jameuen kön sampo ‘an jinoe
h’antom meulaloe mita beulanja
bamdum geumeukat peumakmu nanggroe
teuma sidro-droe sambông sikula
bak teumpat jiduek sinan jimeukat
hana meuhajat keu rumoh raya
nyang peunténg udép sabé hareukat
ngat bèk meularat di dalam dônya
bahasa Acehgeuh götthat fasèh
sahèh meuleubèh nibak po basa
nyang mubloe barang bèk sampé teupèh
ngön basa Aceh lancar usaha
teuma na seudéh kadang sigö-gö
pakön po nanggroe hana padoli
di awak Cina pih na budaya droe
patôt tahiroe ngön tahargai
tapi kali nyô troh seunang até
kageutém piké kageungieng kalön
festival Peunayông jinoe ka lahé
mirah meublé-blé lampu lampion
tabék lônpeu-ék keu walikota
ruang geubuka keu Tionghoa
peugöt peasan peuleumah citra
peudeuh budaya bak ureueng lingka
deungön festival Peunayông raya
talakè warga keukai lam damè
beutameujroh-jroh ngön dum manusia
mangat teubuka pintô sijahtra
beuthat meubida agama geumè
bèk tapeuc’èc’è rukôn teutangga
nyang peunténg sabé udép beudamè
sabé peuramè peumaju kota
akhérul kata lônpeutrôh kalam
keu Banda Aceh nyang ka göt tuha
seulamat ultah keu lapan reutôh nam
seumoga aman makmu sijahtra
(Meunasah Papeun, Mei 2011)
Azwardi; Dosen Gemasastrin FKIP Unsyiah
Posting Komentar